"Bavariya" "Atletiko" hujumchisi Joau Feliksga qiziqish bildirmoqda, deb xabar beradi Sport1.de.

Manbaga ko‘ra, sport direktori Hasan Salihamidjich boshchiligidagi Myunxen klubi menejerlari 22 yoshli portugaliyalikni jamoaga taklif qilib, tarkibni kuchaytirmoqchi bo‘lgan.

Qayd etilishicha, iyun oyida "Bavariya" hujumchining transferi borasida Madrid klubi bilan jiddiy aloqalarni boshlagan, biroq rad etilgandi.

Shu bilan birga, “Atletiko” Feliksni 80 million yevrolik taklifga ham qo‘yib yuborishga tayyor emas. Madridliklar futbolchini sotishga qaror qilsalar, kamida 100 million yevro tovon puli olishga harakat qilishadi.

"Bavariya" portugaliyalik futbolchining narxini pasaytirish uchun himoyachi Benjamin Pavardni ham qo‘shishni ko‘rib chiqdi. Ammo Madrid klubi bu variantga qiziqmadi.

Feliks o‘tgan mavsumda "matraschilar" safida 34 ta o‘yinda 10 ta gol urdi va 6 ta golli uzatmani amalga oshirdi. Hujumchining klub bilan shartnomasi 2026 yilning 30 iyuniga qadar tuzilgan.