"Бавария" "Атлетико" ҳужумчиси Жоау Феликсга қизиқиш билдирмоқда, деб хабар беради Sport1.de.
Манбага кўра, спорт директори Ҳасан Салиҳамиджич бошчилигидаги Мюнхен клуби менежерлари 22 ёшли португалияликни жамоага таклиф қилиб, таркибни кучайтирмоқчи бўлган.
Қайд этилишича, июнь ойида "Бавария" ҳужумчининг трансфери борасида Мадрид клуби билан жиддий алоқаларни бошлаган, бироқ рад этилганди.
Шу билан бирга, “Атлетико” Феликсни 80 миллион евролик таклифга ҳам қўйиб юборишга тайёр эмас. Мадридликлар футболчини сотишга қарор қилсалар, камида 100 миллион евро товон пули олишга ҳаракат қилишади.
"Бавария" португалиялик футболчининг нархини пасайтириш учун ҳимоячи Бенжамин Павардни ҳам қўшишни кўриб чиқди. Аммо Мадрид клуби бу вариантга қизиқмади.
Феликс ўтган мавсумда "матрасчилар" сафида 34 та ўйинда 10 та гол урди ва 6 та голли узатмани амалга оширди. Ҳужумчининг клуб билан шартномаси 2026 йилнинг 30 июнига қадар тузилган.
