O‘zbekistonlik yarim himoyachi Shahboz Umarov Qozog‘istonning «Ordabasi» klubiga o‘tdi. Chimkent shahri klubi Umarov bilan shartnoma imzolanganini e’lon qildi.

Qayd etish kerak, Umarov bungacha BATEda harakat qilib kelayotgandi. U jamoa bosh murabbiyi Aleksandr Mixaylov bilan mojaro tufayli asosiy tarkibdan chetlatilib, o‘rinbosarlar safiga o‘tkazilgandi. Natijada futbolchi joriy mavsum Belarus chempionatida birorta o‘yin o‘tkazmadi.

Ma’lumot uchun, Umarov faoliyatini Toshkentning «Paxtakor» futbol klubida boshlagan. 2018 yilda AGMK klubida to‘p tepgan. Keyinchalik Belarusning «Energetik-BGU» klubiga o‘tdi va 30 ta o‘yin o‘tkazib, 4 ta gol urdi. 2020 yilda esa mamlakatning eng nomdor klubi BATE bilan shartnoma imzoladi. Jamoa safida u 27 ta o‘yinda 6 ta gol urdi.