O‘zbekiston XXXI milliy chempionat davralar oralig‘idagi tanaffus qisqarib, hal qiluvchi ikkinchi davra boshlanishiga ham sanoqli kunlar qolayapti. Birinchi davradan keyingi ta’til hamda Qurbon hayiti bayramini oilasi davrasida o‘tkazgan Bekobodning “Metallurg” jamoasi a’zolari o‘quv-mashg‘ulot maskanlarida jamlanishdi va ikkinchi davra tadorigiga kirishdi. Mashg‘ulotlar har kuni ikki mahaldan tashkil etilyapti. Kunning birinchi yarmida murabbiylar shtabi futbolchilarning jismoniy tayyorgarligini tiklash mashqlariga e’tibor qaratishayotgan bo‘lishsa, kunning ikkinchi yarmida esa to‘p bilan ishlash, o‘yin amaliyotini shakllantirishga urg‘u qaratilyapti. Mashg‘ulotlar trenajer zali hamda “Metallurg” stadionida olib borilayapti.

Ikkinchi davra boshlanishi arafasida “Metallurg” murabbiylar shtabida juz’iy o‘zgarishlar kuzatildi. Xususan oilaviy sharoitiga ko‘ra jamoaning jismoniy tayyorgarlik bo‘yicha murabbiyi Alberto Barrikal klub bilan ikki yoqlama shartnomani bekor qildi. Shuningdek, jamoa tahlilchi murabbiy Artem Petrosyan bilan xayrlashdi.

“Metallurg” mashg‘ulotiga davralar oralig‘ida jamoa bilan shartnoma imzolagan Anvarjon G‘ofurov qo‘shildi. Yozgi transfer oynasidan foydalangan holda klub tarkibning boshqa chiziqlarini ham kuchaytirishga e’tibor qaratadi.