“Andijon” – “Istiqlol” (3:0) o‘rtasidagi uchrashuvdan keyin mehmon jamoa yetakchisi hamda sardori, Tojikiston milliy terma jamoasi a’zosi – Manuchexr Jalilov “Andijon” matbuot xizmatiga o‘yin haqidagi taassurotlari bilan o‘rtoqlashdi.

“Birinchi taymda yaxshi harakat qilgandik. Ikkinchi bo‘limda o‘rtacha o‘yin namoyish etdik. Bu o‘rtoqlik uchrashuvi, unda natija muhim emas. Muhimi, o‘yin amaliyotidir. Bu yo‘lda ikkala jamoa ham shug‘ullanyapti. Mavsumga tayyorgarlik davom etyapti. Asosiysi, o‘z chempionatimizda yaxshi ketyapmiz.

“Andijon” jamoasi asosan ikkinchi qavatda ustunlikka ega ko‘rindi. Himoyachilar va hujumchilari baland bo‘yli futbolchilar ekan. Standartlar orqali hujum tashkil qilisharkan. Biz bungacha “Lokomotiv” va “Navbahor” jamoalari bilan ham o‘ynadik. Ular asosan paslar orqali hujum uyushtirishadi. Albatta, “Andijon”ga natija bo‘yicha yutqazdik. 3:0 haqida yana nima deyishim mumkin? “Andijon” yaxshi o‘ynadi, qoyil. Ularga chempionatda omad tilayman"- dedi Jalilov.