Xabaringiz bor, O‘zbekiston futbol assosiasiyasi futbol mutaxassislari, murabbiylar hamda texnik direktorlarni o‘qitish, malakasini oshirish va ularga xalqaro tajribalarni o‘zlashtirishga ko‘maklashish borasida tizimli ishlarni yo‘lga qo‘ygan. Bu borada o‘zaro tajriba almashish bo‘yicha bir nechta xalqaro tashkilotlar bilan hamkorlik qilib kelinmoqda.

Mana shu hamkorlik doirasida kecha xorvatiyalik taniqli mutaxassis, Jahon chempionati ishtirokchisi, faoliyatida davomida ko‘plab nomdor jamoalar, xususan, «Monpelye», «Xayduk», «Valyadolid», «Napoli» va «Derbi Kaunti» kabi jamoalarda to‘p surgan sobiq futbolchi — Alyosha Asanovich yurtimizga tashrif buyurdi.

Tashrif davomida Alyosha Asanovich O‘zbekistondagi hududiy futbol assosiasiyalarining har bir yo‘nalish bo‘yicha olib borayotgan faoliyatini atroflicha o‘rganish, yurtimizdagi murabbiylar ish faoliyati va tajribasini tahlil qilish hamda tajriba almashish, texnik direktorlarga qo‘yiladigan talab va tavsiyalar bo‘yicha ma’lumot berish kabi vazifalarni maqsad qilgan.

Dastlab Alyosha Asanovich O‘zbekiston futbol assosiasiyasida bo‘ldi. O‘FA rahbariyati bilan uchrashuvda O‘zbekiston bilan hamkorlikda amalga oshirilishi rejalashtirilgan ishlar dasturi muhokama qilindi.

Xorvatiyalik mutaxassis O‘zbekistonda 1 hafta davomida mamlakatimizning bir necha hududlarida bo‘lib, joylardagi futbol bilan bog‘liq vaziyatni o‘rganib chiqish hamda o‘z xulosa va takliflarini taqdim etishni reja qilgan.