«So‘g‘diyona-W» jamoasi bosh murabbiyi Sherali Boboqulov ayollar jamoalari o‘rtasidagi Osiyo chempionati G‘arb mintaqasidan o‘rin olgan Eronning "Bam Xatun" klubiga qarshi bo‘lib o‘tgan ikkinchi o‘yin (1:0) borasida o‘z fikrini bildirib o‘tdi.

"Avvalambor, jamoamizning tarixiy g‘alabasi bilan barchani tabriklayman. Bu g‘alabani futbolni yaxshi ko‘radiganlarga, ayollar futboliga befarq bo‘lmaganlarga bag‘ishlaymiz. Jamoamizning 5 yillik mehnatini bugun ko‘rsatishga harakat qildik. O‘z muxlislarimiz oldida g‘alaba qozonishni maqsad qilgandik. Bu g‘alabaning tagida futbolchilarning ulkan mehnati, jamoa rahbariyati va homiylarining bizga bo‘lgan e’tibori yotibdi.

Bugun jamoamizga qanchalik qiyin bo‘lganini ko‘rdingiz. Xalqaro musobaqada ilk marta ishtirok etyapmiz. Bugungi g‘alabaning qiymati juda yuqori edi. Ko‘p vaziyatlarga ega bo‘lganimizga qaramay, ulardan to‘laligicha foydalana olmadik. Futbol shunisi bilan qiziq. O‘yinlarimizni tahlil qilamiz. Eng asosiysi, g‘alaba qozondik, jamoadagi ruhiyatni ko‘tardik, finalga yo‘llanma oldik.

Ta’kidlaganimdek, "Bam Xatun" himoyada mustahkam o‘ynashga, oxirigacha kurashishga harakat qildi. Raqib bugun qarshi hujumda o‘ynab, o‘z imkoniyatidan foydalanishni maqsad qilgandi. Ammo biz ularga imkon bermaslikka harakat qildik. O‘zimiz esa ularning zaif joylarini topib, undan foydalandik.

Finalga yaxshi tayyorgarlik ko‘rish uchun bizda yetarlicha vaqt bo‘ladi. Final qayerda o‘tkazilishidan qat’i nazar o‘zbekistonlik muxlislarni xursand qilamiz, deb o‘ylayman.

Adashmasam, ushbu musobaqa uchinchi yil tashkil etilyapti. Bu turnir jamoalarga motivasiya beradi, ularning o‘sishiga turtki beradi. Xalqaro musobaqa rahbariyat tomonidan o‘zgacha e’tibor bo‘lishiga turtki beradi. Biz futbolchilar bilan kelishgan holda, mazkur turnirdagi g‘alaba orqali O‘zbekistonda ayollar futboli darajasini bir pog‘ona ko‘tarishni maqsad qilgandik. O‘zbekistonda ayollar futboliga bo‘lgan e’tibor o‘zgarishiga umid qilamiz", — dedi Boboqulov.