"Lester" himoyachisi Uesli Fofana "Chelsi"ga o‘tdi, deya xabar beradi jurnalist Fabrisio Romano.
Manba bergan xabarga ko‘ra, tomonlar 21 yoshli fransiyalik futbolchining transferi borasida to‘liq kelishib olgan. Fofana londonliklar bilan 2028 yilning yoziga qadar hisoblangan shartnoma imzolaydi. Transfer summasi 75 million funtni (taxminan 88,5 million yevro) tashkil qiladi.
Eslatib o‘tamiz, o‘tgan mavsumda jarohati tufayli himoyachi “Lester” bilan bor-yo‘g‘i 12 uchrashuv o‘tkazib, bitta gol urgan.
Bugun, 27 avgust kuni APLning 4-turi doirasida “Chelsi” va “Lester” jamoalari o‘zaro to‘qnash kelishadi. Uchrashuv Toshkent vaqti bilan 19:00da boshlanadi.