«MYU» Rafael Varan ishtirokida klub muxlislari bilan ijtimoiy tarmoqlarda suhbat uyushtirdi.
Unda fransiyalik himoyachi turli mavzudagi savollarga javob berdi. Quyida ana shu o‘ziga xos intervyudan eng qiziqlarini e’tiboringizga havola etdik.
- Futbolga mehr qo‘yishingizga kim sababchi bo‘lgan?
- Bolaligimda har bir yaxshi futbolchiga ergashganman. Alohida bir kishini ajratib ko‘rsatolmayman. Lekin, albatta, ko‘proq himoyachilarga e’tibor berardim va shunchaki futboldan zavq olishni xohlardim.
- Qanday qilib bosim ostida bunchalik xotirjam bo‘lishga muvaffaq bo‘lasiz?
- Shunchaki o‘zligimda qolishga harakat qilaman. Bosimni o‘zgartirish uchun konsentrasiyani saqlash va diqqatni jamlashga harakat qilaman. Va xotirjamlikni saqlashga harakat qilaman, lekin bu har doim ham oson bo‘lmaydi. Shunday bo‘lsada, bor e’tiborimizni o‘yinga qaratamiz.
- Hozirgacha «Yunayted»dagi o‘yinlaringizdan qaysi biri sizga ko‘proq yoqdi?
- Bitta o‘yinni ajratish qiyin, lekin «Old Trafford»dagi birinchi golim o‘zgacha lahza bo‘ldi.
- «MYU» safidagi ilk golingizni («Brentford»ga qarshi o‘yinda) urganingizda o‘zingizni qanday his qildingiz?
- Albatta, bu ajoyib edi. Aql bovar qilmas tuyg‘ular... juda xursand bo‘ldim.
- Nega 19-raqamni tanladingiz?
- Bu «Real»dagi birinchi raqamim edi, shuning uchun uni boshqa buyuk klubda ham saqlab qolishga qaror qildim.
- Tarixdagi eng sevimli futbolchingiz kim?
- Javob berish qiyin. Mening sevimli o‘yinchim yo‘q, shunchaki futboldan zavqlanaman.
- JCH-2018 finalining so‘nggi hushtagini eshitganingizda birinchi bo‘lib nimani o‘yladingiz?
- Bu o‘zgacha lahza edi. Faoliyatimda boshdan kechirgan eng kuchli tuyg‘u, desam adashmayman. Bu juda katta kubok va alohida onlar, shuning uchun ajoyib bo‘ldi.
- Futboldan tashqari eng katta yutug‘ingiz nima?
- Hayotimdagi eng muhim narsa bu mening oilam. Demak, eng muhimi shu.
- «MYU»ning qaysi sobiq futbolchisi bilan o‘ynashni ko‘proq hohlagan bo‘lardingiz?
- Ehtimol, Loran Blan bilandir, chunki u ham men kabi fransiyalik himoyachi va ajoyib futbolchi bo‘lgan.
- Siz klub va xalqaro miqyosda katta jamoalarda o‘ynagansiz, sizningcha, «MYU» nimasi bilan ajralib turadi?
- Menimcha, «Old Trafford» o‘zgacha. Bu yerdagi muxlislar ajoyib. Biz doim va dunyoning har bir chekkasida qo‘llab-quvvatlashlarini his qilamiz.
M.PO‘LATOV tayyorladi
