Superligasining 18-turidan o‘rin olgan “Qo‘qon-1912” – AGMK (0:0) o‘rtasidagi uchrashuvdan keyingi matbuot anjumanida AGMK jamoasi ustozi Mirjalol Qosimov ishtirok etdi.
– Qiziqarli va kurashlarga boy o‘yin bo‘ldi. Haqli ravishda durang bo‘ldi. Birinchi bo‘limda “Qo‘qon-1912” jamoasi hujumlarda yaxshi harakatlandi. Ayniqsa Shohnazar Norbekov bizga qiyinchilik tug‘dirdi. Ikkinchi bo‘limda o‘yin tizginini qo‘limizga oldik. Lekin bunday o‘yinlarda ko‘p imkoniyat bo‘lmaydi. Vaziyatlarimiz bor edi, futbolchilarimiz gol urishlari kerak edi. O‘yin vaqti o‘tib borgani sari o‘yinchilarda ko‘p “brak”lar bo‘ladi. “Qo‘qon-1912” jamoasini ham tushunib turibmiz, ular pastki o‘rinlardan birida. Duranglar o‘ynayapti. Biz esa yuqori maqsadlarni qo‘yganmiz va bunday bahslarda yutishimiz kerak. Lekin shunaqasi ham bo‘lib turadi.
– “Qo‘qon-1912″da Ivan Yosovich, Anvar Hojimirzayev, Bilolxon Toshmirzayev, Aleksandr Merzlyakovlar maydonga tushmadi. Kuchsizlangan jamoani yengish uchun AGMKga nima yetishmadi?
– Gol yetishmadi. “Qo‘qon-1912” jamoasini kuchsiz demayman. Jadvalda bunday o‘rindagi jamoalar bilan o‘yin juda ham qiyin. Superligada qolish uchun jon-jahdi bilan kurashyapti. Muxlislar uchun gol kerak, g‘alaba kerak. O‘z jamoasi uchun muxlislik qilishadi. Ikkinchi bo‘limda gol urganimizda o‘yin yanada boshqacha bo‘lardi. O‘yin yanada ochilardi. O‘zinglar ham guvoh bo‘ldinglar, jamoa ikkinchi raqamda harakat qildi. Bunaqada yorib kirish qiyin bo‘ladi.
– Valijon Rahimov nega 2 ta o‘yindan buyon maydonga tushmayapti?
– Unda jarohat bor.
– Keyingi turda “Paxtakor” bilan o‘yinda bugungi yo‘qotilgan ochkoni to‘ldirishga ishonasizmi?
– Har bir o‘yinga tayyorlanamiz, ajratmaymiz. Taqvim bo‘yicha o‘ynaymiz. Kim bilan o‘ynashimizdan qat’iy nazar doim chiroyli o‘yin ko‘rsatish va albatta g‘alaba uchun chiqamiz.
– “Nasaf” bilan kubok o‘yinida final uchun harakat qilasizlarmi?
– Albatta, harakat qilamiz, axir klubdagi barcha harakatlar sovrin yutish uchun amalga oshirilayapti. Yarim finalgacha oson bo‘lmadi. OCHL yo‘llanmasi uchun o‘yin bo‘ladi.
