YECHLning ikkinchi turida "Bavariya" o‘z maydonida "Barselona"ni qabul qiladi. Kataloniyaliklar yevrokuboklarda ketma-ket to‘rt o‘yindan beri Myunxen klubiga mag‘lub bo‘lib kelmoqda. Seshanba kuni esa "Barsa" uchun hammasi yanada murakkab bo‘lishi mumkin. Ayniqsa, mehmonda. Ayni damda "Bavariya"ning ichki chempionatdagi ahvoli yaxshi emas. Ammo "Barselona" bilan hammasi boshqacha bo‘ladi. Quyida "Barselona" o‘ta ehtiyot bo‘lishi kerak bo‘lgan raqibning uchta futbolchisi keltirib o‘tiladi.

1. Sadio Mane

Mane "Bavariya"ga Levandovskiga o‘rinbosar sifatida olib kelingan edi. Sobiq "Liverpul" hujumchisi old chiziqning har uchala qismida o‘ynay oladi. Bu esa "Bavariya" uchun juda muhimdir. Mavsum boshlanganiga 1 oy bo‘ldi. Mane esa yangi jamoasida 5 ta gol urishga erishdi. U bo‘lajak o‘yinda "Barselona" himoyachilariga yaxshigina "bosh og‘riq" bo‘lishi kutilmoqda.
Yulian Nagelsmanning futbol sxemasida, Mane to‘qqizinchi raqamli hujumchi vazifasiga qo‘yilgan. Ammo u istalgan vaqtda qanotlarda ham o‘ynash qobiliyati va imkoniyatiga ega bo‘ladi. Turgan gapki, bunday o‘zgaruvchanlik, istalgan raqib himoyachisi uchun murakkablik tug‘diradi.

2.Yozua Kimmix

Kimmix "Bavariya"ning eng muhim futbolchisiga aylanib ulgurgan. Futbolchining tajribasi, vaziyatlarni ko‘ra-bilishi va yetakchiligi, jamoaga juda kerakli qurol sanaladi. Kimmix to‘pni nazorat qilish, o‘yinni boshqarishda, tashabbus qarshi tarafda bo‘lganida esa, pressingning ikkinchi chizig‘ida katta ish bajara oladi. "Barselona" bu jihatlarni hisobga olgan holda, Kimmixning jarima zarbalari hamda standart vaziyatlardagi uzatmalaridan ehtiyot bo‘lishi lozim. Uning passlari ayniqsa, de Ligt hamda Lukas Ernandes raqib jarima maydoni ichida bo‘lganida, yanada xavfli tus oladi. Kimmix, shuningdek, bo‘lajak bahsda ter Shtegenni uzoq masofadan beradigan zarbalari orqali ham "sinov"dan o‘tkazib ko‘radi.

3. Jamal Musiala

Kimmix va Mane o‘z tajribalari orqali jamoani muqobil ushlab tursa, ularning bir sherigi, butunlay boshqacha uslub namoyish etishga tayyorgarlik ko‘rmoqda. U Jamal Musialadir. Yosh yarim himoyachi "Bavariya"ning eng ijodkor futbolchisi sifatida e’tirof etiladi. Uning o‘ziga xos uzatmalari raqib mudofaasini oson yorib o‘tishda katta rol o‘ynaydi. Shuningdek, Jamal dribling qobiliyati tufayli, bemalol himoyachilarni chalg‘ita oladi. Shu sababdan "Barselona" o‘z pressing qobig‘ining ikkinchi chizig‘iga Musialaga qarshi tura oladigan tayanch yarim himoyachilarini joylashtirishi kerak.
Shuningdek, "Bavariya" safida katta xavf deya Alfonso Deyvisni ham ayta olamiz. Qanot vakilining zargarona paslari "Barsa" uchun o‘ta murakkab ishga aylanishi tayin. Kanada terma jamoasi a’zosi "qizil-anorranglilar" o‘ng qanotini tindirmasligi aniq. Deyvis va Jyul Kunde to‘qnashuvini ko‘rish esa muxlislar uchun qiziq voqea bo‘ladi.

ISMATOV J.