Jurnalist Yurgen Kloppdan APLdagi o‘yinlarning qoldirilgani jamoa ritmini buzib qo‘yishi mumkinligi haqida so‘raganda, murabbiy to‘g‘ri ta’kidladi - aksincha, tanaffus jamoaning ritmga tushib olishiga yordam berishi mumkin.

"Chelsi", "Liverpul" va "Manchester Yunayted"ning 2 tadan o‘yini boshqa kunga qoldirildi. "Arsenal", "Tottenhem" va "Manchester Siti" esa, kelayotgan shanbada maydonga tushadilar. Taqdirni hazilini qarangki, aynan ko‘proq mashg‘ulotga muhtoj bo‘lgan va o‘yin ritmini topishga ehtiyoj sezgan jamoalarda bu imkoniyat taqdim etilmoqda.

Chunki "Arsenal" ham, "Siti" va "Tottenhem" ham transfer bozoridagi asosiy o‘zgarishlarni ancha erta amalga oshirishdi va mavsumoldi yig‘inlarda to‘liq optimal tarkibda qatnashishdi. Mavsum startida bu qo‘l kelgani shubhasiz, aynan shu jamoalar hozirda dastlabki uch o‘rinni egallab turibdi.

Avval sanalgan uch jamoa esa, aksincha. "Chelsi" asosiy xaridlarini avgustning oxirida amalga oshirdi, buning ustiga murabbiy almashdi. Mundialgacha jamoalar haftada ikki o‘yin rejimida o‘ynashini e’tiborga olsak, to‘laqonli mashg‘ulot o‘tashning ham imkoni yo‘q - tanaffus Potter uchun foydali. "Yunayted" ham Kazemiro, Antoni kabi transferlarni ancha kech amalga oshirdi, Eriksen, Ronaldu kabi futbolchilar yig‘inlarga ancha kech qo‘shilishdi. "Liverpul" esa, asosan jarohatlar va maydon markazidagi muammolar tufayli, mavsumni ko‘ngildagidek boshlay olmadi. Kloppning gaplarida jon bor.

Xullas, ha, qachondir bu jamoalar boshqalardan ko‘ra kamroq dam oladilar, qaysidir haftada ortiqcha o‘yin bo‘ladi, lekin Klopp, Ten Xag va Potter hozirgi tanaffusni sovg‘adek qabul qilayotganlari shubhasiz.

Qahramon Aslanov.