Londonning “Arsenal” klubi yarim himoyachisi Granit Jaka faoliyatini Italiyada davom ettirishi mumkin edi. "Roma" bosh murabbiyi Joze Mourinyo shveysariyalik futbolchining muxlisi va uni o‘z jamoasiga qo‘shib olmoqchi edi, biroq Jaka Shimoliy Londonni tark etishdan bosh tortdi. Bu haqda jurnalist Fabrisio Romano tvitterda xabar berdi.
29 yoshli Jaka "Arsenal"ga 2016 yilning yozida Myonxengladbaxning "Borussiya" klubidan kelib qo‘shilgan edi. Yarim himoyachi joriy mavsumda barcha musobaqalarda 8 ta o‘yinda maydonga tushib, 1 ta gol urdi va 3 ta golli uzatmani amalga oshirdi. Granit va "Arsenal" o‘rtasidagi kelishuv 2024 yilning yoziga qadar mo‘ljallangan.
"Arsenal" Angliya Premyer-ligasida 7 o‘yindan so‘ng 18 ochko bilan turnir jadvalida peshqadamlik qilmoqda.