1-9 oktyabr kunlari Turkiyaning Istanbul shahrida amputantlar o‘rtasida Jahon chempionati bo‘lib o‘tadi. Unda 5 karra jahon chempioni O‘zbekiston amputantlar terma jamoasi ham ishtirok etadi. Jamoamiz “E” guruhidan o‘rin olgan holda Polsha, Ispaniya hamda Tanzaniya terma jamoalariga qarshi bahs olib boradi.
Bugun ushbu nufuzli musobaqa oldidan O‘FA rahbariyati va jamoa vakillari uchrashdi. Matonat, iroda va jasurlikni namoyish qilib kelgan, mundiallarda yuqori natija qayd etgan vakillarimizning bu galgi turnirda ham munosib ishtirok etishlariga tilak bildirildi.
“Bu terma jamoa haqida butun futbol jamoatchiligi va muxlislar iliq fikrda. Jamoamiz har doim yaxshi natija ko‘rsatib, Jahon chempionatlarida sovrindor bo‘lgan. Men har doim o‘z xonamdagi ushbu suratni ko‘rib, g‘ururlanaman. Matonatli yigitlarimiz bu gal ham musobaqada yuqori natija qayd etishiga ishonamiz”, dedi Ravshan Irmatov.
Shundan keyin jamoa bosh murabbiyi Rustam Mehmonov ham o‘z fikrlarini bildirib o‘tdi. Uchrashuv yakunida O‘FA rahbariyati turnir oldidan yana bir bor jamoamizga omad tiladi.