1-9 октябрь кунлари Туркиянинг Истанбул шаҳрида ампутантлар ўртасида Жаҳон чемпионати бўлиб ўтади. Унда 5 карра жаҳон чемпиони Ўзбекистон ампутантлар терма жамоаси ҳам иштирок этади. Жамоамиз “E” гуруҳидан ўрин олган ҳолда Польша, Испания ҳамда Танзания терма жамоаларига қарши баҳс олиб боради.
Бугун ушбу нуфузли мусобақа олдидан ЎФА раҳбарияти ва жамоа вакиллари учрашди. Матонат, ирода ва жасурликни намойиш қилиб келган, мундиалларда юқори натижа қайд этган вакилларимизнинг бу галги турнирда ҳам муносиб иштирок этишларига тилак билдирилди.
“Бу терма жамоа ҳақида бутун футбол жамоатчилиги ва мухлислар илиқ фикрда. Жамоамиз ҳар доим яхши натижа кўрсатиб, Жаҳон чемпионатларида совриндор бўлган. Мен ҳар доим ўз хонамдаги ушбу суратни кўриб, ғурурланаман. Матонатли йигитларимиз бу гал ҳам мусобақада юқори натижа қайд этишига ишонамиз”, деди Равшан Ирматов.
Шундан кейин жамоа бош мураббийи Рустам Меҳмонов ҳам ўз фикрларини билдириб ўтди. Учрашув якунида ЎФА раҳбарияти турнир олдидан яна бир бор жамоамизга омад тилади.
