Жозе Моуриньо аллақачон "Реал" таркибини режалаштиришни бошлагани ҳақида гап-сўзлар юрибди. Португалиялик топ-мураббий мадридликлар раҳбариятидан тўртта позицияни кучайтиришни сўрагани, улардан бири – ўнг қанот ҳимояси эканлиги ҳақида маълумотлар пайдо бўлганди.
Душанба куни "Реал" Дани Карвахаль жамоадан кетишини эълон қилди ва энди мадридликларга Трент Александр-Арнольд билан рақобатлаша оладиган футболчи керак. Журналист Мигель Серранога таянган ҳолда The Touchline нашрининг хабар беришича, Жозе Моуриньога ҳимоячи Диогу Далотнинг ўйини жуда ёқади. "Special One" Мадрид клубидан "Манчестер Юнайтед"нинг 27 ёшли португалиялик футболчисини сотиб олишни сўраши мумкин.
Нуфузли Transfermarkt портали Диогу Далотнинг трансфер қийматини 30 миллион еврога баҳоламоқда. Аввалроқ ушбу ҳимоячи "МЮ" сафида Моуриньо қўл остида тўп сурган.
