Yosh futbolchilardan tuzilgan «Energetik-BGU» klubi joriy mavsum Belarus Oliy ligasida chempionlikka da’vo qilmoqda.
Bunda «talabalar»ga «Nasaf» tarbiyalanuvchisi Bobur Abduxoliqovning samaradorligi juda qo‘l kelmoqda. Hamyurtimiz joriy mavsum Oliy liganing o‘zida 21ta o‘yin o‘tkazib, 20ta gol va 6ta samarali uzatma to‘plashga ulgurdi. Hujumchimiz shuning barobarida Belarus kubogi doirasidagi 1ta o‘yinda o‘zini ko‘rsatdi - 1tadan gol va assist. Asosiysi, u Belarus chempionati to‘purarlari poygasida ta’qibchilarini ancha ortda qoldirgan holda, peshqadamlik qilmoqda. Hujumchimiz yaqinda ijtimoiy tarmoq orqali Minsk klubi muxlislari bilan alohida muloqotga kirishdi.
- Minskda siz uchun vaqt qanday o‘tyapti?
- O‘yinlar va mashg‘ulotlardan bo‘shasam, shunchaki, dam olyapman, futbol ko‘ryapman.
- Mavsum davomida yuqori sport formasini bir maromda saqlab turibsiz...
- Hammasi oddiy: kuniga ikki mahal astoydil mashg‘ulot o‘tkazyapmiz.
- Belarus yoqdimi? Minsk shahri-chi?
- Gap yo‘q. Minksda hammasi joyida, shahar ham juda go‘zal.
- Yozgi transferlar vaqti boshqa klublardan takliflar olganingizni bilamiz. Ularni nega rad etdingiz?
- Shunchaki, aytilgan sharoitlar to‘g‘ri kelmadi.
- Keyingi turda ham gol ura olasizmi?
- Albatta, harakat qilaman.
- Bosimga qanday chidayapsiz? Har holda, hozir chempionatning eng yaxshi to‘purarisiz...
- Bosim yo‘q, buni his qilmayapman.
- Joriy mavsum shu darajada muvaffaqiyatli kelishini kutganmidingiz?
- Bunday natija kutilgandi. Chunki mavsumoldi yig‘inlarida qattiq ishladik. Kayfiyat shunga yarasha, a’lo!
- Yaqin kelajak bo‘yicha rejalaringizni ayta olasizmi?
- Maqsad - top-chempionatlardan birida o‘ynash.
