Bu hafta yakunida APL yana qaytadi. Unda ikkita markaziy uchrashuv mavjud. Shulardan biri "Arsenal" hamda "Tottenxem" bahsidir. Ayni damda "Shporlar" o‘z qo‘shnilaridan bir ochko ortda bormoqda. Agar ular derbi bahsida g‘alaba qozonsa, "Manchester Siti" "MYU" bilan yakshanba kuni o‘ynashini hisobga olib, "Tottenxem"ni birinchi o‘ringa ko‘tarilib oladi deyish mumkin. Ammo hozirgi "Arsenal" ham anoyilardan emas. Jamoa 7 ta turdan 6 tasida g‘alaba qozongan. Qolaversa, Mikel Arteta jamoasida raqibga qaraganda kuchliroq tarkib shakllangan. Ammo jamoada bir qator yo‘qotishlar ham bor. Xususan, "Arsenal" Emil Smit-Rou hamda Muhammad Elnenidan foydalana olmaydi. Parti, Zinchenko va Uaytlarning taqdiri ham so‘roq ostida qolmoqda. Shunga qaramay, Arteta uchun Edegor hamda Tirni xizmatga tayyor bo‘ladi. Quyida har ikki jamoa futbolchilaridan tuzilgan ramziy terma jamoa e’tiboringizga havola etiladi.
"Arsenal"ning yozgi xaridi bo‘lgan Gabriyel Jezus mavsumni fantastik darajada boshladi. Ammo Xarri Keynni tanlash adolatliroq bo‘ladi. Shu sabab markaziy hujumga Keyn nomzodini tanladik. Chap qanotda "shporlar" yulduzi Son harakat qilsa, o‘ng uchun Angliya terma jamoasi a’zosi bo‘lgan Sakani tanlab oldik.
Martin Edegor o‘ninchi raqamli futbolchi rolini bajarib, pleymeyker zonasiga joylashtiriladi. Tayanch yarim himoyasiga esa "Arsenal"dan Granit Jaka, "Tottenxem"dan Pyer-Emil Xyoybyerg olindi.
Himoya borasida ham biz uchun qaror qabul qilish ancha murakkab kechdi. Shu sabab quyidagicha qaror qildik. Vilyam Saliba APLdagi davrini zo‘r boshladi. Ammo uning o‘rniga markazda Kristian Romero qo‘yildi. Sheriklikka esa Gabriel Magalyansh tanlangan. Qanotlarni "Arsenal" futbolchilar egallaydi. Xususan, chapda Kiran Tirni harakat qilsa, o‘ng uchun AQSHga qarshi o‘rtoqlik o‘yinida 90 daqiqa fantastik o‘yin ko‘rsatgan Takexiro Tomiyasu loyiq topildi.
Darvozabon borasida ancha o‘ylanishimizga to‘g‘ri keldi. Chunki bunda imkoniyatlar deyarli 50-50 edi. Shunga qaramay, oxirgi o‘yinlardagi natijalarga tayangan holda Ugo Lyoris o‘rniga Eron Ramzdeylni qo‘ydik. O‘ylaymizki, bu nisbatan adolatli qaror bo‘ladi.
Eslatib o‘tamiz, "Arsenal" APLning 8 turidan o‘rin olgan bahsda "Tottenxem"ni mehmon qiladi. O‘yin 1 oktyabr kuni, Toshkent vaqti bilan 16:30da start olishi belgilangan. Shimoliy London derbisi Premyer-liganing keyingi turiga qadar qaysi klub yetakchilik qilishini belgilab berishi mumkin.
Shuningdek, siz ushbu hafta yakunida Manchester derbisini ham kuzatib borish imkoniga ega bo‘lasiz.
Ayni damdagi turnir jadvali esa quyidagicha:
1. "Arsenal" - 18 ochko
2. "Man. Siti" - 17 ochko
3. "Tottenxem" - 17 ochko
4. "Brayton" - 13 ochko
5. "MYU" - 12 ochko.
ISMATOV J.
