O‘tgan dam olish kunlari Krishtianu Ronaldu yana o‘zini hammaga eslatib qo‘ydi: "Everton"ga qarshi Premyer-ligadagi joriy mavsumdagi debyut goli uning klub darajasidagi 700-yubiley golga aylandi. 37 yoshida Angliyaning eng kuchli klublarining birida asosiy tarkib uchun kurashni davom ettirayotgan buyuk futbolchini hurmat qilishga yana bir sabab. Ammo bularning barchasi Krishtianuning haqiqiy holatini baholashda fikrni xiralashtirmasligi kerak.
Ronalduning ten Xag qo‘l ostidagi muammolari haqida juda ko‘p maqolalar va xabarlar yozilgan. Krish pressingda yetarlicha faol emas, qanotda kerakli miqdordagi yutuqlarni bera olmaydi va harakatchanlik borasida hujum markazidan joy uchun kurashda Reshfordga yutqazadi. Va yozda "Manchester Yunayted"ni tark etish istagi haqidagi hikoya portugaliyalikning pozisiyasiga ustunlik qo‘shmadi. Manchester Evening News nashrining yozishicha, Krish klubdan transfer haqidagi iltimosini qaytarib olmagan. Demak, uning niyati o‘zgarmasa kerak.
Ronaldu yubiley golini urdi, bu ajoyib. Lekin, aslida, bungacha u zaxirada boshlagan APLda ketma-ket 5ta o‘yin o‘tkazgan va mavsumning 10ta o‘yinida atigi 2ta gol va 1ta golli uzatmani amalga oshirgan. 37 yoshli futbolchi uchun yomon statistika emas, lekin, bu jahon yulduzining maqomi va maoshiga to‘g‘ri kelmaydi. Ronaldu “Manchester Yunayted” bilan qishki transfer oynasiga katta savol bilan yaqinlashmoqda, ya’ni u jamoa bilan hamkorlikni davom ettiradimi?
"Manchester Yunayted" bilan hammasi ozmi-ko‘pmi aniq bo‘lib ulgurgan. Daily Star xabariga ko‘ra, qishda klub portugaliyalik bilan 11 million yevro evaziga xayrlashishga tayyor. Erik ten Xagning aytishicha, u Ronnii saqlab qolishni xohlaydi, ammo bu bahsli holatni kuchaytirmaslik uchun murabbiylarning odatiy iborasiga o‘xshaydi. Ha, va Krishtianuning ketishi klubga yangi kelganlar uchun ish haqi byudjetini jiddiy ravishda tushirishga imkon beradi. Albatta, Ronaldu rotasiyada bo‘lgan holda hali ham foydali bo‘lishga tayyor va ehtimol bir mavsumda 10 ta gol urishi mumkin. Bu soliqlarni hisobga olmaganda 31 million yevroga tengmi, degan savol tug‘iladi.
Ammo Ronalduning o‘zi uchun dilemma yanada jiddiyroq. Tanlov oddiy top-klub tarkibidagi joy uchun kurashish yoki boshqa klubga o‘tib faoliyatini chiroyli tugatish. Mish-mishlarga ko‘ra, Devid Bekxem Krishtianuni AQSHga chorlamoqda va uni o‘zining "Inter Mayami"sida o‘ynatmoqchi. Bu vaziyatda maosh borasida Ronalduning foydasiga qaror qilinadi va hatto hozirgi ish haqidan ko‘proq pul taklif qilingan yiliga 34 million yevro. Albatta, Ronalduning Yevropada qolishi mumkinligini inkor etib bo‘lmaydi. Masalan, jurnalistlar Todd Boeli qishda Krishtianu bilan shartnoma imzolashni xohlayotgani haqida yozishmoqda, ammo bu ko‘proq sport yutuqlarini emas, balki klubning tijorat ko‘rsatkichidagi yaxshilashga bo‘lgan urinishga o‘xshaydi.
Bu orada portugaliyalik dunyoning eng yaxshilaridan biri maqomini yo‘qotmoqda. Ueyn Runi to‘g‘ridan-to‘g‘ri Ronaldu endi 22 yoshidagidek emasligini, Kassano Krish faoliyatini yakunlash vaqti kelganiga ishonchi komil, Qatardagi jahon chempionati tashkilotchilari esa uni 32 ta eng yaxshi futbolchilar ro‘yxatiga kiritmaslikka qaror qilishdi.
Kelgusi oylarda Ronaldu faoliyatini qanday yakunlamoqchi ekanligini hal qilishi kerak. Bu ajoyib hikoya go‘zal nuqtaga loyiqdir. Krishtianu faoliyatining cho‘qqisida ketmaslikka qaror qildi, uning eng yaxshi formasi o‘tmishda qoldi. Lekin hech narsa unga Ibragimovich kabi futbolchi sifatidagi so‘nggi kungacha top-klubning markazidan joy uchun kurashishga to‘sqinlik qilmaydi. Savol shundaki, unga bu kerakmi?
