"Bavariya" prezidenti Gerbert Xayner klubning sobiq futbolchisi Robert Levandovskining 2021/2022 yilgi mavsumning eng yaxshi hujumchisi sifatida taqdirlanishi haqida fikr bildirdi, shuningdek, "Oltin to‘p"ni topshirish marosimi yakunida Sadio Mane qo‘lga kirigan mukofot va Jamol Musialaning yutug‘i haqida gapirdi.

“Biz Sadio Maneni “Oltin to‘p” uchun ovoz berishda ikkinchi o‘rin va ijtimoiy majburiyatlari uchun berilgan mukofot bilan samimiy tabriklaymiz. Sadio ajoyib shaxs va biz bu mavsumda u "Bavariya"da o‘ynaganidan faxrlanamiz. Jamol Musialaning eng yaxshi yosh futbolchi sovrini uchun kurashda uchinchi o‘rinni egallashi ham bizni juda xursand qildi. Jamolni oldinda katta yutuqlar kutmoqda, bunga aminmiz.

Dunyoning eng sermahsul hujumchisi sovrini Gerd Myuller nomi bilan atalgani biz uchun sharaf. Robert Levandovskini ushbu sovrin bilan tabriklayman", - dedi Xayner.

Eslatib o‘tamiz, kecha, 17 oktyabr kuni "Oltin to‘p" sovrinini topshirish marosimi bo‘lib o‘tdi. "Real" hujumchisi Karim Benzema France Football nashri tomonidan yilning eng yaxshi futbolchisi deb topildi.