Boks bo‘yicha Osiyo chempionati boshlanishiga oz vaqt qolmoqda. Ushbu musobaqaga O‘zbekiston ayollar terma jamoasi vakillari ham qizg‘in tayyorgarlik ko‘rishmoqda. Biz tayyorgarlik jarayoni yuzasidan ayollar terma jamoasi bosh murabbiyi Elshod Rasulovning fikrlari bilan qiziqdik.

— Osiyo chempionatiga tayyorgarlik qanday o‘tmoqda?
— Iordaniyada o‘tkaziladigan Osiyo chempionatiga tayyorgarlik yaxshi davom etmoqda. Ayni paytda tayyorgarlikning so‘nggi bosqichini olib boryapmiz. O‘quv-mashg‘ulot yig‘ini poytaxtimizda, O‘zbekiston boks federasiyasida o‘tkazilmoqda.

— Iordaniyaga boradigan yakuniy tarkibni aniqlab oldingizmi?
— Ayni paytda bizda 20 nafar bokschi nazoratimizda. Osiyo chempionati uchun esa 10 nafar bokschini tanlab olamiz. Demak, hozircha yakuniy tarkib aniq emas. Qit’a birinchiligida 10 ta vazn toifasida ishtirok etamiz. -81 kg hamda +81 kg vazn toifasidagi qizlarimiz ba’zi sabablarga ko‘ra musobaqada qatnashishmaydi. -48, -50, -52, -54, -57, -60, -63, -66, -70, -75 kg vazn toifalarida bokschi qizlarimiz Osiyo chempionatida medallar uchun kurashishadi.

— Tarkib nima asosida shakllantiriladi?
— Asosiy tarkibda 20 nafar qizimiz bor. Ular o‘z vaznlarida O‘zbekistonda 1 va 2-raqam hisoblanishadi. Tayyorgarlikdan qaysi sportchilarimiz muvaffaqiyatli o‘tsa, kim ruxan va jismonan tayyor bo‘lsa murabbiylar shtabi bilan birgalikda aynan o‘shalarni tanlab olamiz.

— Asosiy raqib sifatida qaysi mamlakat bokschilari kutilmoqda? Xitoy xam tanaffusdan so‘ng Osiyo chempionatida qatnashishi mumkinligi haqida xabarlar tarqaldi.
— Yaxshi bilasiz, Osiyoda ayollar bokschi yaxshigina rivojlangan va kuchlilar ko‘p. Xitoy, Hindiston, Qozog‘iston, Yaponiya, Koreya, Tailand, Xitoy Taypeyi kabi mamlakat qizlari biz uchun asosiy raqib hisoblanishadi.