U zaxiradan maydonga tushishdan bosh tortdi va diskvalifikasiya qilindi. Buni qanday tushunish kerak?
"Manchester Yunayted" Krishtianu Ronalduni diskvalifikasiya qildi. Yaqin orada u mashg‘ulotlarda yolg‘iz o‘zi shug‘ullanadi. Bu qaror sabablari rasman ma’lum qilinmagan, ammo ular futbolchining demarshi bilan bog‘liqligi aniq. Bir kun oldin hujumchi o‘yinning asosiy vaqti hali tugamasidan (89:24) stadionni tark etgandi.
The Athletic xabariga ko‘ra, Ronaldu o‘yin tugashidan oldin stadionni tark etgan va "Tottenxem" ustidan qozonilgan g‘alabani sheriklari bilan nishonlamagan. Shuningdek, Angliyaning asosiy sport OAVlari hujumchi ushbu o‘yinda zaxiradan maydonga tushishdan bosh tortgani haqida xabar berishdi.
"Manchester Yunayted" Ronaldu shanba kuni (22 oktyabr) APLning 13-turi doirasidagi "Chelsi"ga qarshi o‘yinda maydonga tushmasligini rasman e’lon qildi. The Guardian muxbiri xabariga ko‘ra, bosh murabbiy ten Xag portugaliyalikni qishda qo‘yib yuborishga tayyor, ammo muammo futbolchining haftasiga 500 ming funt sterling maosh olishida.
Bu butun hikoyada klub uchun ham, futbolchi uchun ham savollar tug‘iladi. Murabbiy nima uchun Ronaldu yozda jamoada qolishini ta’kidlagani aniq emas. Ko‘rib turganimizdek, u markaziy hujumchi o‘rniga birinchi nomzod emas. Balki ikkinchi bo‘lmasa ham kerak, chunki Marsiyal va Reshford ham bu pozisiyada o‘ynashi mumkin. Bunday ego va maoshga ega futbolchini zaxirada ushlab turish shubhali qaror. Ammo, tan olish kerak, Reshford “Tottenxem”ga qarshi o‘yinda ko‘plab imkoniyatlarni yo‘qqa chiqardi va buni kuzatish juda qiyin edi.
Ronalduga bundan ham ko‘proq savollar bor. Agar u "Manchester Yunayted"da qolgan bo‘lsa, futbolchi klubni ham, jamoadoshlarini ham hurmat qilishi kerak. Ilgari Ronaldu futbolning kosmik darajasini ko‘rsatdi va uni bunday "xurmacha" qiliqlari uchun ko‘p kechirishdi. Tabiiyki, 37 yoshga kelib, uning faoliyatida pasayish yuz berdi.
Bir tomondan, Ronaldu o‘sha yoshda sayyoramizning eng raqobatbardosh ligasiga yo‘l olgani hurmatga loyiq. Boshqa tomondan, futbolchining maqomi uning hozirgi imkoniyatlariga to‘g‘ri kelishi aniq. Premyer-ligada joriy mavsumda u maydonda 340 daqiqa davomida atigi bitta gol urdi. Qolaversa, forvard boshqa hujumchilarga qaraganda to‘psiz harakatda unchalik foydali emas.
Aftidan, Ronaldu jamoani tark etishi uchun zaxiradan maydonga tushishdan bosh tortgan. To‘g‘ri, bunday voqea avvalroq yozda "Rayo Valyekano"ga qarshi o‘yinda ham sodir bo‘lgandi - Krishtianu uchrashuv yakunini kutmasdan stadionni tark etgan. Buning sababi Ronaldu yozda "MYU"ni tark etib, YECHLda ishtirok etadigan klub safiga bormoqchi edi. Ammo bu reja o‘xshamadi. Odatda, agar o‘yinchilar boshqa jamoaga ketishni istasa bu mavsum Levandovski yoki o‘tgan yili Keynda bo‘lgani kabi yangi klublari aniq bo‘ladi. Lekin Ronalduda bunday bo‘lmadi. Uning yuqori maoshi boshqa klublarga og‘irlik qildi.
Hujumchiga ta’sir qilishi mumkin bo‘lgan muhim daqiqa - bu bir oydan keyin boshlanadigan jahon chempionati. Ronaldu uchun har qanday holatda ham o‘yin amaliyotisiz qolishi alamli. Aftidan, Ronalduning “Manchester Yunayted”dagi davri nihoyasiga yetmoqda. Va balki nafaqat "Manchester Yunayted"da...
