"Real" hujumchisi Karim Benzema bolaligidanoq "Oltin to‘p"ni qo‘lga kiritishni orzu qilganini aytdi.
“Bolaligimdan bu mening asosiy maqsadlarimdan biri edi. “Oltin to‘p”ni qo‘lga kiritishni xohlaganim uchun mashg‘ulotlarga bordim, deb o‘ylamang. Ammo bu fikr doimo miyamda bo‘lgan. Men Zidan va Ronaldo shakllantirgan avlod bilan o‘sganman. Ular "Oltin to‘p"ni qo‘lga kiritishdi. Ularni tomosha qilib, futbolni sevishni o‘rgandim. O‘tgan yili men to‘rtinchi o‘rinni egalladim, finalchilar qatorida qoldim, lekin katta jamoaviy sovrinlarni qo‘lga kirita olmadim. Bu yil men hamma narsani yutdim. Men ajoyib mavsum o‘tkazdim.
Men faoliyatimga tegishli bo‘lgan barcha orzularimni amalga oshirishga harakat qilaman. Men orzu qilgan narsaga erishaman. Eng zo‘r bo‘lish - shunchaki gol urishdan ko‘ra ko‘proq narsa", - dedi 34 yoshli hujumchi Marca nashri bilan suhbatda.
O‘tgan mavsumda Benzema "Real" bilan La Liga va Chempionlar Ligasida g‘olib chiqdi va har ikkala musobaqada ham eng yaxshi to‘purarga aylandi. Madrid klubi tarkibida futbolchi 2009 yildan buyon o‘ynab kelmoqda.
