"Реал" ҳужумчиси Карим Бензема болалигиданоқ "Олтин тўп"ни қўлга киритишни орзу қилганини айтди.

“Болалигимдан бу менинг асосий мақсадларимдан бири эди. “Олтин тўп”ни қўлга киритишни хоҳлаганим учун машғулотларга бордим, деб ўйламанг. Аммо бу фикр доимо миямда бўлган. Мен Зидан ва Роналдо шакллантирган авлод билан ўсганман. Улар "Олтин тўп"ни қўлга киритишди. Уларни томоша қилиб, футболни севишни ўргандим. Ўтган йили мен тўртинчи ўринни эгалладим, финалчилар қаторида қолдим, лекин катта жамоавий совринларни қўлга кирита олмадим. Бу йил мен ҳамма нарсани ютдим. Мен ажойиб мавсум ўтказдим.

Мен фаолиятимга тегишли бўлган барча орзуларимни амалга оширишга ҳаракат қиламан. Мен орзу қилган нарсага эришаман. Энг зўр бўлиш - шунчаки гол уришдан кўра кўпроқ нарса", - деди 34 ёшли ҳужумчи Marca нашри билан суҳбатда.

Ўтган мавсумда Бензема "Реал" билан Ла Лига ва Чемпионлар Лигасида ғолиб чиқди ва ҳар иккала мусобақада ҳам энг яхши тўпурарга айланди. Мадрид клуби таркибида футболчи 2009 йилдан буён ўйнаб келмоқда.