Superliga 23-turidan o‘rin olgan «Navbahor» – «Olimpik» (1:1) o‘yinidan so‘ng mehmonlar bosh murabbiyi Timur Kapadze o‘yinda jamoasi g‘alabaga haqli bo‘lgani, «Olimpik» loyihasi hamda o‘z shogirdlarining maydondagi harakatlari haqida gapirdi.

«Bunday stadion, muhit qarshisida o‘ynash oson emas. Qolaversa, muxlislarning qo‘llab-quvvatlashlari ajoyib darajada. Shunga qaramay, bugun jamoam g‘alabaga haqli o‘yin namoyish etdi, deb o‘ylayman. Afsus, o‘yin ohirida gol qo‘yib yubordik.

«Olimpik» loyihasi foyda keltirayapti. Ko‘plab futbolchilar o‘ynayapti, terma jamoalarga chaqirilayapti. Terma jamoa bosh murabbiyi sifatida bundan xursandman.

Maydonda shogirdlarim o‘zaro tortishgani sizlarga jiddiy tuyulgan bo‘lishi mumkin. Ammo, maydonda bunday holatlar kuzatilishi tabiiy. Futbolchilar yosh va qiziqqon. O‘zaro tortishuvlari normal holat. Maydonda yosh yoki yoshi katta yo‘q. Albatta, o‘yinda vaziyat taqozo etsa bir-birlari bilan gaplashishlari, tortishishlari mumkin», — dedi Kapadze.