O‘zbekiston milliy jamoasi noyabr oyidagi yig‘in doirasida Bosniya va Gersegovina terma jamoasi bilan o‘rtoqlik o‘yini o‘tkazishi mumkin.

Rossiya nashrlarining O‘zbekiston futbol assosiasiyasi xodimiga asoslanib xabar tarqatishicha, Bosniya terma jamoasi Rossiya bilan o‘rtoqlik o‘yini o‘tkazishdan qochish maqsadida O‘zbekiston bilan o‘ynashga rozi bo‘lishi kutilmoqda. Tomonlar kelishuvga erishishsa, bu uchrashuv 20 noyabr kuni o‘tkaziladi.

Eslatib o‘tamiz, O‘zbekiston terma jamoasi 16 noyabr kuni Toshkentda Qozog‘istonga qarshi o‘rtoqlik o‘yinida maydonga tushadi.

Ma’lumot o‘rnida. Bosniya va Gersegovina hamda Rossiya terma jamoalari o‘rtasida o‘rtoqlik o‘yini o‘tkazilishi mumkinligi haqida xabar chiqqach, Edin Jeko, Miralem Pyanich kabi bosniyaliklarning barcha yetakchilari bu o‘yinda ishtirok etishdan bosh tortishgandi.