Jahon chempionati boshlanishiga sanoqli kunlar qolmoqda. Butun dunyo eng nufuzli musobaqa startini intizorlik bilan kutmoqda. Yaqindagina "BCA Research" agentligi tomonidan tahlil o‘tkazildi. Unda ishga solingan superkompyuter turnir bahslari natijalarini taxmin qildi. Quyida shu haqida so‘z boradi.
Berilgan ma’lumotlardagi taxminlarda Argentina chempion bo‘lishi aytiladi. Messi boshchiligidagi jamoa finalda Portugaliyani mag‘lub etadi. Tarixda Portugaliya hech qachon Jahon chempionati finalida o‘ynamagan. Ammo bu safar superkompyuter Fernandu Santush shogirdlari imkoniyatini yuqori baholamoqda.
Angliya bu safar ham o‘tgan mundialdagi natijasini takrorlashi aytilgan. Inglizlar yarim finalgacha yetib boradi va u yerda Portugaliyaga penaltilar seriyasida yengiladi. 2006 yilgi Jahon chempionatida ham bu ikki jamoa to‘qnashgan. O‘shanda chorak final bahsida Portugaliya penaltilarda g‘alabaga erishgan.
Angliya terma jamoasi B guruhida o‘rin olgan va guruh bahslarini yetakchi sifatida tugatishi taxmin qilingan. Garet Sautgeyt jamoasi Eron bilan o‘yinda 84 foiz g‘alaba qozonish ehtimoliga ega. AQSH bilan esa bu ko‘rsatkich 54 foizni tashkil etadi. Uels bilan bahsda Angliyaning g‘alaba qozonish imkoniyatlari 77 foiz ekani aytilgan.
Pley-offda inglizlar Senegalni mag‘lub qiladi. Chorak finalda esa Meksika bilan to‘qnash kelib, ustunlikka erishadi.
Angliya, shuningdek, chorak finalda Fransiya bilan ham to‘qnash kelishi mumkin. Ammo amaldagi chempionlar D guruhini ikkinchi o‘rinda tugatishi ehtimoli bilan bu voqea yuz bermaydi.
Angliya terma jamoasining sobiq ustozi Sem Ellerdays inglizlarni Jahon chempioni bo‘lishiga ishonmoqda. U Angliyaning Qatardagi imkoniyatlarini o‘ta yuqori baholashini bildirgan.
ISMATOV J.
