"Bavariya" himoyachisi Benjamen Pavar jamoasining so‘nggi ikki o‘yinida zaxirada qolib ketganidan hafsalasi pir bo‘ldi. Bu haqda nemis jurnalisti Florian Plettenberg ijtimoiy tarmoqlarda xabar berdi.
Manba bergan xabarga ko‘ra, futbolchining noroziligiga bosh murabbiy Yulian Nagelsmann ikki uchrashuvda uni zaxirada qoldirish qarorini tushuntirmagani ham sabab bo‘lgan.
"Barselona" bilan Chempionlar ligasi o‘yinida Pavar 67-daqiqada zaxiradan maydonga tushdi va yakunda gol urishga muvaffaq bo‘ldi. Bundesliga doirasidagi “Mayns” bilan bellashuvda fransiyalik futbolchi 45 daqiqani maydonda o‘tkazdi.
