Krishtianu Ronaldu “Manchester Yunayted”ga qaytgani faoliyatidagi eng katta falokat ekanini ta’kidladi. Bu haqda The Sun nashri yozdi.

Gazeta keltirgan ma’lumot taniqli jurnalist Jonatan Klegg tomonidan yozilgan kitobda aks ettirilgan. Bu kitob kelasi oy nashrdan chiqadi.

Manbaning ta’kidlashicha, Ronalduning o‘zi o‘tgan yili Ralf Rangnik boshqaruvidagi jamoaga qaytganini salbiy baholagan.

Portugaliyalik yulduz o‘zi ketgan sana – 2009 yildan beri jamoa o‘zgarmaganidan g‘azabi kelgan. Bundan tashqari, Ronalduga bir necha o‘yinchilardan tashqari jamoaning aksariyat a’zolari jismoniy holatini uning darajasida ushlab turishga harakat qilmayotgani ham yoqmagan. Rahbariyatga mashg‘ulotlar bazasini yangilash kerakligini ham uqtirgan.

Ronaldu ilk bor 2003-2009 yillarda “Manchester Yunayted” sharafini himoya qilgan va aynan ser Aleks Fergyuson qo‘l ostida superyulduz darajasiga ko‘tarilgan edi.

2021 yili klubga qaytgan futbolchining amaldagi hamkorligi mavsum oxirida yakunlanadi. Tomonlar hozirning o‘zida ajralish bo‘yicha bir qarorga kelib bo‘lgan.