Superliga 24-turidan o‘rin olgan “Olimpik” – “Metallurg” (2:1) o‘yinidan so‘ng mezbon jamoa bosh murabbiyi Timur Kapadze jamoasining kamchiliklari borligi, mavsum “Olimpik” uchun katta tajriba bo‘lgani va Muhammadali G‘iyosov haqida fikr bildirdi.

“Oxirgi 5-10 daqiqani inobatga olmasa, hammasi yaxshi. Shu daqiqalargacha biz o‘yinni to‘liq nazorat qilgan edik. Muhimi g‘alaba. Kamchiliklar bor va ular ustida ishlaymiz”, - deydi murabbiy.

“Vaziyatlardan foydalana olmaslik bugun kuzatilgan holat emas. Mavsum davomida shu holat kuzatilib kelinayapti. Mahorat, tajriba kabi muhim jihatlar bor. Bular ustida ishlab kelayapmiz. Maydonda ruhiy holatning ham o‘rni bor”

“Jamoamning Superligadagi mavsumidan ko‘nglim to‘layapti. Kuchlilar orasida o‘ynayapmiz. Har bir o‘yin bizga foydali bo‘layapti. Tajriba o‘sdi. Ko‘p durang o‘ynadik. Yutqazgan o‘yinlarimiz ham bizga yutuq bo‘ldi. O‘sha durang o‘ynagan o‘yinlarda ham biz ko‘proq g‘alabaga haqliroq edik. Menga natijadan ko‘ra, shu yigitlarning qanchalik o‘sganligi muhim”

“Muhammadali G‘iyosov bugun yaxshi o‘ynadi. Penalti ishladi. Gol urdi. Ikkinchi golda qatnashdi. Xursandman. Shunday davom etsa, asosiy tarkibdagi o‘rnini mustahkamlaydi”.