Superliga 24-turidan o‘rin olgan “Lokomotiv” – “Navbahor” (0:2) o‘yinidan so‘ng mezbon jamoa bosh murabbiyi Denis Korostichenko o‘yin natijasini ikkita vaziyat hal qilganini va Mirko Yelichich jamoani tayyorlashda unga katta yordam berayotganini aytdi.
“Bugungi natijadan qat’iy nazar “Lokomotiv” muxlislariga rahmat aytmoqchiman. Qiyin ahvolda ekanimizga qaramay, oxirigacha ishonib bizni qo‘llab-quvvatlashayapti. “Navbahor” muxlislarini esa g‘alaba bilan tabriklayman. Ular bundan ham ortig‘iga loyiqlar. Qolaversa, ular futbolni ham yaxshi tushunishadi. Birinchi davradagi o‘yinimizdan keyin bizni qarsaklar bilan kuzatib qo‘yishgan edi. “Olimpik”ni ham shunday kuzatishgan edi”, - deydi murabbiy.
“Umuman, “Navbahor”ni g‘alaba bilan tabriklayman. O‘yinga kelsak, ikkita vaziyat va ikkita gol – natija hal”.
“Shu o‘rinda, Mirko Yelichichga minnatdorchilik bildirmoqchiman. U menga jamoani o‘zgartirishda juda katta yordam bermoqda, buni o‘zingiz ham ko‘rib turibsiz. Jamoa o‘z o‘yinini o‘zgartirdi, ammo hali beri bizga omad kelmayapti. Yelichich kuchli mutaxassis, unga rahmat”.
