Iordaniyadagi boks bo‘yicha Osiyo chempionatida bugun erkaklar o‘rtasida yarim final janglari doirasida ikkinchi "klasiko" bo‘lib o‘tdi. 67 kg vazndagi vakilimiz Asadxo‘ja Mo‘ydinxo‘jayev qozog‘istonlik Dulat Bekbauovga qarshi bahs olib bordi.

Bokschilar birinchi bo‘limni nisbatan ehtiyotkorlik bilan o‘tkazishdi va bir-birlarining xatolaridan foydalanishga intilishdi. Hakamlarning 3 nafari ustunlikni qozoq sportchisiga berishdi.

Ikkinchi raundda ham vaziyat deyarli shunday davom etdi. Bu safar 3 hakam Dulatga o‘z ovozini berdi. So‘nggi bo‘lim oldidan hisob 2:1 ko‘rinishga keldi. Jang taqdir so‘nggi raundga qoldi.

Uchinchi bo‘limda har ikki sportchi borlarini berib jang qilishdi. Bir vaziyatda Bekbauovning yuzi yorilib, qon oqib ketdi hamda unga 2 marta tibbiy yordam ko‘rsatildi. So‘nggi 3 daqiqalikda Asadxo‘janing aniq va kuchli chiqa boshladi. Ammo hakamlarning yakuniy bahosi quyidagicha bo‘ldi — 2:3 (28:29, 29:28, 27:30, 28:29, 29:28), Bekbauov foydasiga.  

Shu tariqa, o‘zbekistonlik uchinchi bokschi bronza bilan cheklandi.