Iordaniyaning Amman shahrida bo‘lib o‘tayotgan boks bo‘yicha Osiyo chempionatida o‘zbekistonlik sportchilarning barchasi yarim final janglarini o‘tkazishdi.

Vakillarimiz orasida so‘nggi bo‘lib Madiyar Saidrahimov (92 kg.) final yo‘llanmasini qo‘lga kiritdi. U yarim finalda mezbon sportchi Ahmat Sulayman At-Teymatga qarshi ringga ko‘tarildi hamda barcha raundlarda to‘liq ustunlikka erishdi. Hakamlarning baholari — 5:0 (30:27, 30:27, 30:27, 29:28, 29:28).

Shu tariqa, bugun yarim final jingida ishtirok etgan 10 nafar bokschidan 7 nafari final yo‘llanmasini qo‘lga kiritdi. Ular: Saidjamshid Ja’farov, Lazizbek Mullojonov, Hasanboy Do‘smatov, Abdumalik Xalakov, Ruslan Abdullayev, Odiljon Aslonov va Madiyar Saidrahimov. Shahzod Muzaffarov, Adhamjon Muhiddinov va Asadxo‘ja Mo‘ydinxo‘jayev yarim finalda yengilib, bronza medaliga ega chiqishdi.