Ammandagi boks bo‘yicha Osiyo chempionatida bugun erkaklar o‘rtasida final janglari boshlandi. Hozirgina musobaqaning eng qiziqarli janglaridan biri yakunlandi. 51 kg. vaznda jahondagi eng kuchli bokschilardan ikki nafari — Rio-2016 olimpiadasi g‘olibi Hasanboy Do‘smatov va Belgrad-2021 jahon chempionati oltin medal sohibi Saken Bibossinov o‘zaro to‘qnash kelishdi. Vatandoshimiz Serbiyadagi JCHda aynan Sakenga yutqazib qo‘ygandi.

Hamyurtimiz bo‘y va qo‘llarining uzunligi jihatdan ustunlikka ega bo‘lgan raqibiga nisbatan juda yaxshi taktika qo‘llay oldi. Do‘smatov himoyani mustahkam ushlagan holda raqibiga kutilmaganda zarbalar berdi.

Birinchi bo‘limda hakamlarning 3 nafari Bibossinovga, ikki nafari esa Hasanboyga ustunlikni berishdi. Ikkinchi raundda yurtdoshimiz faollikni oshirdi va bu safar 4 hakamning ovozini olishga muvaffaq bo‘ldi va so‘nggi bo‘lim oldidan yaxshi ustunlikka ega bo‘lib oldi, ammo hali hech narsa hal bo‘lmagandi.

Do‘smatov uchinchi raundda ham raqibining erkin harakatlanishiga imkon bermaslikka intildi va o‘z maqsadiga erishdi. Yakuniy baholar — 4:1 (30:27, 30:27, 29:28, 29:28, 28:29).