Qozog‘iston terma jamoasi darvozaboni Igor Shatskiy O‘zbekistonga qarshi bo‘lib o‘tgan o‘rtoqlik o‘yinidagi mag‘lubiyat sabablarini aytdi.

"O‘yin biz rejalashtirgandek o‘tmadi. Murabbiy aytgan ishlar amalga oshmadi. Birinchi bo‘limda butunlay yo‘qolib qoldik, vaziyatlarni kam yuzaga keltirdik. Yumshoq qilib aytganda, birinchi taymni to‘liq boy berdik.

Ikkinchi taymda yuqoriroq konsentrasiya bilan o‘ynadik. Ammo hisobda ortda borayotgan jamoa uchun hamisha qiyin bo‘ladi. O‘zbekiston terma jamoasi — juda yaxshi raqib. Shomurodovning individual mahorati o‘yin taqdirini hal qildi. Umuman olganda, juda sifatli terma jamoa. Qoyil.

Muxlislarning qo‘llab-quvvatlashi juda muhim. Ular bugun bizni yolg‘izlatib qo‘yishmadi. Ulardan uzr so‘ragan bo‘lardim. Ammo biz hech narsaga qaramay oldinga intilamiz. Mart oyida boshlanadigan Yevropa chempionati saralash o‘yinlariga tayyorlanamiz. Murabbiylar shtabi bugungi bahsdan xulosalar qiladi.

Aslida, bugungi uchrashuv biz uchun juda og‘ir kechdi, ammo, o‘ylashimcha, biz tiklanamiz va qandaydir yangi taktikani sinab ko‘ramiz. Murabbiylar shtabi hammasini bizga yetkazadi", — dedi Shatskiy.