Meksikaning Gvadalaxara shahrida Taekvondo WT bo‘yicha jahon chempionati bo‘lib o‘tmoqda. Bugun musobaqaning uchinchi kun bahslari yakunlandi.

Afsuski, unda ishtirok etgan ikki nafar hamyurtimiz Ulug‘bek Rashitov (-68 kg) va Zarnigor Husniddinova (-49 kg) sovrindorlar qatoridan joy olisholmadi.

O‘z vaznining yetakchilaridan biri hisoblangan Ulug‘bek Rashitov birinchi bosqichdan ozod etilgan bo‘lsa, ikkinchi bosqichda u puerto-rikalik sportchini osonlik bilan mag‘lub etdi.

Nimchorak finalga hamyurtimizga ozarboyjonlik Javad Og‘ayev raqiblik qildi. Birinchi bo‘limda hisob ochilmagan bo‘lsa-da, inobatga olinmagan zarbalar tufayli ustunlik ozar taekvondochisiga berildi. Ikkinchi raudda esa Ulug‘bek 4:2 hisobida g‘alaba qozonib, raundlar bo‘yicha hisobni tenglashtirdi. Uchinchi bo‘limda esa Og‘ayev 6:5 hisobida g‘alaba qozondi va olimpiada chempionini musobaqadan chiqarib yubordi. Javadning o‘zi bronza medalini qo‘lga kiritdi.

Zarnigor Husniddinova esa ilk bosqichdayoq marokashlik sportchiga imkoniyatni boy berdi.

Ushbu kunda shohsupaga ko‘tarilgan taekvondochilar:

Erkaklar, -68 kg:
1. Do-YUn Kvon (Koreya Respublikasi)
2. Bredli Sinden (Buyuk Britaniya)
3.  Javod Agayev (Ozarbayjon)
3. Rizo Kalxor (Eron)

Ayollar, -49 kg:
1. Daniyela Souza (Meksika)
2. Guo Sin (Xitoy)
3. Dunyo Abutolib (Saudiya Arabistoni)
3. Panipak Vongpattanakit (Tailand)