"Sautgempton" va "Tottenxem"ning sobiq bosh murabbiyi Maurisio Pochettino Angliya terma jamoasida ishlashga qarshi emasligini aytdi.

Ayni damda 50 yoshli argentinalik mutaxassis jamoasiz bo‘lib turibdi. Yozda u "PSJ" bosh murabbiyi lavozimini tark etgandi.

“Albatta, mening Angliya bilan munosabatlarim har doim juda yaxshi bo‘lgan. Akademiyalar bilan munosabatlarimiz yaxshi, terma jamoaga yosh futbolchilarni yetishtirishga harakat qilmoqdamiz. Bu yerda (Angliyada) o‘zimni juda qulay his qilaman. Siz nima bo‘lishini hech qachon bilmaysiz. Men barcha takliflarga ochiqman", - deya Pochettinoning so‘zlarini keltiradi Athletic.

Angliya terma jamoasini hozirda Garet Sautgeyt boshqarmoqda, uning shartnomasi 2024 yilning yoziga qadar mo‘ljallangan. U 2022 yilgi jahon chempionatidan keyin jamoani tark etishi mumkinligi xabar qilingandi.