“Milan” va Fransiya terma jamoasi hujumchisi Olivye Jiru Qatarda bo‘lib o‘tadigan 2022 yilgi jahon chempionati haqidagi fikrlari bilan o‘rtoqlashdi.

Futbolchi bo‘lajak jahon chempionati uning uchun oxirgisi bo‘lishini tan oldi.

“Bu, albatta, oxirgi marta! Demak, turnirdan barcha mumkin bo‘lgan his-tuyg‘ularni va zavqni olishingiz kerak. Men har daqiqadan zavq olishni xohlayman! Va, albatta, jamoaga chempionlikni himoya qilishga yordam bermoqchiman. Turnir muhimligini hamma tushunadi", - deya 36 yoshli hujumchining so‘zlaridan iqtibos keltiradi pianetamilan.it.

Futbol bo‘yicha 2022 yilgi jahon chempionati 20 noyabrdan 18 dekabrga qadar Qatarda bo‘lib o‘tadi. Jahon chempionatining amaldagi sohibi Fransiya terma jamoasi hisoblanadi.

Fransuzlar guruh bosqichida Avstraliya, Daniya va Tunis terma jamoalari bilan to‘qnash kelishadi.