Joriy mavsum yakunlariga ko‘ra Pro ligaga tushib ketgan "Qo‘qon-1912" jamoasi futbolchilari Superligada qancha vaqt o‘ynganiga to‘xtalib o‘tamiz.

Jamoaning tajribali yarim himoyachilaridan biri San’at Shixov bu mavsumda “Qo‘qon-1912” tarkibida barcha o‘yinlarda maydonga tushgan yagona futbolchi sifatida tarixga kirdi. San’atbek barcha 26 ta tur o‘yinlarida maydonda ko‘rinish berdi, uning maydonda o‘tkazgan daqiqalari 1814 daqiqani tashkil qiladi.

Muxlislarning sevimli futbolchisiga aylangan Quvondiq Ro‘ziyev esa 25 ta uchrashuvda maydonga tushgan bo‘lishiga qaramay bu mavsum maydonda eng ko‘p vaqt to‘p surgan futbolchi sifatida qayd etildi. Quvondiqning maydonda o‘tkazgan daqiqalari 2160 daqiqani tashkil qiladi.

Shuningdek mahoratli va universal futbolchimiz, Osiyo chempioni Oybek Rustamov jami 24 ta o‘yinda maydonga tushgan va 2155 daqiqa maydonda to‘p surdi. Serbiyalik legionermiz Ivan Yosovich, jamoa yetakchisi Javohir Sidiqov va darvozabon Muzaffar Abdullayev ham o‘tgan mavsumda boshqalarga nisbatan ko‘proq vaqt maydonga tushishganligini qayd etishimiz lozim bo‘ladi.

Joriy mavsumda jamoa tarkibida uch nafar yosh futbolchi superligada o‘z debyut o‘yinlarini o‘tkazishdi. 2022 yilda tug‘ilgan Azizxon Erkinov AGMK bilan bo‘lgan o‘yinda 11 daqiqa maydonda harakat qilgan bo‘lsa, 2005 yilda tug‘ilgan yosh iste’dod sohibi Murodjon Komilov “Lokomotiv”ga qarshi bo‘lib o‘tgan bahsda 17 daqiqa maydonda to‘p tepdi. Shuningdek 2001 yilda tug‘ilgan Diyorbek Jaloldinov “Surxon”ga qarshi, safarda bo‘lib o‘tgan bahsda o‘z debyutini o‘tkazdi.

"Qo‘qon-1912" murabbiylari o‘tgan mavsumdagi superliga o‘yinlarida  umumiy 25 nafar futbolchining xizmatlaridan foydalanishdi.