"Barselona" e’tiborini Portugaliya terma jamoasining o‘sib borayotgan yulduzi Gonsalu Ramushga qaratdi, deb xabar beradi Diario Sport.
Ramush Portugaliya asosiy tarkibida Krishtianu Ronalduni almashtirib, JCH 1/8 finalida Shveysariyaga qarshi o‘yinda xet-trik qayd etib, butun dunyoni lol qoldirdi.
Ramushgacha 32 yil davomida hech kim JCH pley-off o‘yinida uchta gol urishga muvaffaq bo‘lmagandi.
O‘tgan yozda "Benfika" Gonsaluni sotishga tayyor edi. Fabrisio Romanoning so‘zlariga ko‘ra, unga faqat "PSJ" jiddiy qiziqish bildirgan, ammo yakunda klub futbolchini 45 million yevroga sotib olishni istamagan.
Hozir hammasi o‘zgardi: Ramushning Qatardagi yorqin o‘yinidan so‘ng unga "Barselona" qiziqa boshladi, ammo muammo shundaki, futbolchining narxi sezilarli darajada oshdi. Sport xabariga ko‘ra, "Benfika" Ramushning narxini 120 million yevroga oshirgan va endi portugaliyaliklar uni arzonroq narxga qo‘yib yuborishi aniq emas.