Xorvatiya terma jamoasi bosh murabbiyi Zlatko Dalich kechagi jahon chempionatining chorak finalida Braziliya ustidan qozonilgan g‘alabaga jamoa sardori Luka Modrichning hissasini yuqori baholadi.
"Modrich 120 daqiqa o‘ynadi va bizga g‘alaba keltirdi va kerakli vaqtda o‘yindan keyingi seriyada penaltini ham golga aylantirdi. U shunchaki aql bovar qilmaydigan futbolchi. Luka charchamadi va to‘xtashni o‘ylamadi. Men uni qo‘shimcha vaqtda almashtirmoqchi edim, lekin u menga o‘ynashga tayyorligini aytdi", - dedi Dalich o‘yindan keyin o‘tkazilgan matbuot anjumanida.
Eslatib o‘tamiz, yarim final bosqichida Xorvatiya Argentina bilan o‘ynaydi. Uchrashuv 13 dekabr kuni bo‘lib o‘tadi.
