«Sho‘rtan» 2022 yilni qarzdorliksiz yakunlashga erishdi. Va nihoyat!

Biz klub smetasiga akademiya va stadion projektorlari masalasini kiritgandik. Buning natijasida:

— akademiya qayta ta’mirdan chiqdi;
— akademiya faoliyati uchun mablag‘ ajratila boshlandi;
— akademiya normal sharoitda ishlashni boshladi;
— 400 lyuksdan 1300 ga yetkazildi.

2023 yilning mart oyiga qadar projektor yanada yaxshilanadi. Biz 2022 yilning yoz oyidan boshlab G‘uzordagi o‘yinlarni shom vaqtidan keyin o‘tkazishga erishdik. Maydon Pro liga talabiga to‘la javob beradi.

Akademiya, projektor uchun pul yo‘naltirilgach, «Sho‘rtan»da kuchli futbolchilar jalb qilish imkoni tabiiyki bo‘lmadi. Evaziga klub biz istayotgan darajadagi faoliyatga qaytdi. Yaxshi menejer — stabil faoliyatdir. Futbol klublarining hammasida ham bunday menejerlar yo‘q. «Sho‘rtan»ning yutug‘i hozircha shunda. Klub bor pulini futbolchilar uchun sarflab, Superliga uchun kurashishi ham mumkin edi. Ammo u birinchi galda botqoqdan chiqdi, o‘ziga kelishni boshladi, zanjirli muammolarga barham berdi. Endi esa normal akademiya va to‘g‘ri boshqaruv bilan yildan-yilga o‘sib borish imkoniyatiga ega.

O‘zbek futboliga qo‘shtirnoq ichidagi tajribali futbolchilardan iborat futbolchilar to‘dasi emas, normal darajada faoliyat olib boradigan professional futbol klublari zarur. Biz shu g‘oya bilan ishlayapmiz. Faqat nomigina professional bo‘lgan futbol klublarini tom ma’noda normal klublarga aylantirish o‘ta qiyin va azobli kechayotganini kanalimiz o‘quvchilari bilishlari kerak.

Diyor Imomxo‘jayev.