Samarqand jamoasi Superliga va Pro liga o‘rtasida ovora. Tizimli muammolar hal qilinmas ekan, bu jarayon uzluksiz davom etishi ehtimol. «Dinamo» 2023 yilni Superligaga qaytish uchun emas, tom ma’noda professional klubga aylanish uchun o‘tkazishi to‘g‘riroq. Muammolar:

— klub balansida deyarli hech narsa yo‘q, sarf-harajat asosan ko‘chmanchi murabbiy va futbolchilarning oylik-maoshi, mukofot pullaridan iborat;

— Qorasuvdagi BO‘FM moddiy-texnik bazani rivojlantirishga muhtoj;

— klub mashg‘ulot maydoni mavjud bo‘lgan bazaga ega emas;

— klub «Dinamo» stadionidan foydalanish uchun Milliy gvardiyaga ijara haqi to‘laydi va chiptalardan daromad ko‘rmaydi.

Superliga talabiga javob beradigan 11 ta ham klub yo‘q deymiz-ku.  

«Dinamo» so‘nggi uch yilda ikki narsani o‘rgandi:

— mavsumni qarzlarsiz yopish («Dinamo» hisob-raqamida mablag‘i mavjud bo‘lgan kam sonli klublardan biri, klubda vijdonli kishilar ishlayapti);

— minimal harajat bilan Superligaga qaytish (2021 yil bu borada «Dinamo» hammaga o‘rnak bo‘lgan).

Bu yerda viloyat hokimi jamoa uchun pul topa olyapti, klub homiylari uni rivojlantirishga tayyor, klubda futbolni ichidan biladigan mutaxassislar faoliyat olib boryapti. Gap faqatgina aniq pozisiya va maqsadni belgilab olishda qolgan. Holat o‘zgarishi uchun birlamchi maqsad Superliga bo‘lmasligi kerak. 2023 yilni:

— klub bazasini qurish;

— BO‘FM uchun yotoqxona qurish va maktab normal ishlashini ta’minlash;

— stadion masalasini hal qilish kabi masalalarga bag‘ishlash mumkin.

Mana shu holatda «Dinamo» o‘rinbosarlari safida yetishib chiqayotgan yosh mahalliy futbolchilarga 2023 yil davomida Pro ligada tajriba to‘plash imkoniyati taqdim etiladi. Aks holatda esa qandaydir mutaxassis yana o‘sha-o‘sha ko‘chmanchi yulduzlar bilan Superligaga qaytish rejasini ishlab chiqadi, biroq professional bo‘lmagan bunday jamoa yana o‘sha-o‘sha chempionatda jon saqlash uchun kurashib yuradi, bundan viloyat futboli hech narsa yutmaydi.

Diyor Imomxo‘jayev.