Xvicha Kvarasxeliya - 2022/2023 yilgi mavsum birinchi qismida «Napoli»ning eng yorqin yulduzi bo‘ldi. Gruziyalik yarim himoyachi A Seriyada ajoyib o‘yin ko‘rsatmoqda va 12 o‘yinda 6+7 natija qayd etdi. «Lokomotiv» Moskva hamda «Rubin»ning sobiq futbolchisi o‘zi uchun muhim yil yakunida DAZN nashriga intervyu berdi. Biz uning eng muhim qismlarini e’tiboringizga havola etamiz.
Xvicha kimni o‘zining kumiri deb bilishini aytdi.
— Sevimli futbolchim Guti. Men uni doim kuzatardim, uning o‘yin uslubi menga yoqadi. Men unga qaraganimda ajoyib harakatlarni kashf qilaman, lekin u tezda nafaqaga chiqdi. Shundan so‘ng Krishtianu Ronaldu mening sevimli futbolchimga aylandi.
«Napoli» yarim himoyachisi o‘zini Yevropaning eng kuchli futbolchilaridan biri deb hisoblaydimi?
— Men hali ham bu maqomdan uzoqdaman, lekin buni tasdiqlash uchun qo‘limdan kelganini qilaman. Gruziyadan ajoyib jamoaga kelishimni kutmagandim. «Napoli» kabi klubda o‘ynash mening orzuim edi, lekin hali oldinda juda ko‘p ishlar bor.
Nima uchun Kvarasxeliya «Napoli»ni tanladi?
— Birinchi navbatda, jamoa nomi tufayli. Bu yerda juda yaxshi futbolchilar bor. Keyin «Napoli» o‘yinlarini tomosha qilganimda, murabbiy uslubiga mukammal moslasha olaman deb o‘yladim. Ularning o‘yini menga juda yoqdi. Endi aytishim mumkinki, men «Napoli»ning to‘laqonli a’zosiman. Bundan tashqari, shahar o‘zining go‘zalligi bilan hayratda qoldiradi va neapolliklar ajoyib odamlardir. Bu yerda odamlar futbolga muhabbat bilan yashaydi. Futbolni hamma tushunadi. Butun shahar sizni qo‘llab-quvvatlasa va doimo sizga muhabbat bildirsa, o‘yinchi g‘ayrat bilan harakat qiladi.
Boshqa Italiya jamoalarichi? Ular haqida o‘ylab ko‘rmadingizmi?
— Aniq bilmayman, «Napoli»dan taklif bo‘lgani uchun boshqa hech narsa haqida o‘ylamagandim. Klub bilan muzokaralar taxminan ikki yil davom etdi. Bunday katta jamoa menga qiziqish bildirayotganidan xursand bo‘ldim. «Napoli» libosini kiyishga sabrim yetmasdi.
Dastlabki uchrashuvlardanoq mahalliy jurnalistlar va muxlislar Neapolning yangi yulduziga laqab berishni boshladilar: Zizi, Anjelo Azzurro, Kvaradona yoki Kvaravadjo. Kvarasxeliya ulardan eng sevimlisini tanladi:
- Tanlash juda qiyin bo‘ldi. Ularning barchasi juda yoqimli. Lekin, albatta, Maradona nomining kichik bir qismi sizning ismingizga qo‘shilsa, boshqacha tuyg‘u qoldiradi. Bu meni g‘ururga to‘ldirdi. Demak, Kvaradona — mukammal taxallus.
