Erik ten Xag "Manchester Yunayted"ning o‘rinbosarlar jamoasini to‘liq nazoratga oldi, deb xabar beradi The Mirror.

Niderlandiyalik mutaxassis o‘tgan yilning bahorida "Yunayted" bilan muzokaralar chog‘ida 23 yoshgacha bo‘lgan jamoani boshqarishga ruxsat berilsagina klubni boshqarishga rozi bo‘lganini ma’lum qildi.

Kechagi matbuot anjumanida ten Xag ushbu yechimning asosiy afzalligi haqida batafsil gapirib berdi. Uning so‘zlariga ko‘ra, bu ikkinchi va birinchi jamoa o‘rtasidagi aloqani mustahkamlaydi.

“Barcha yoshdagi jamoalar o‘rtasidagi hamkorlik klubda to‘g‘ri madaniyatni shakllantirish uchun juda muhimdir. “Manchester Yunayted”ga kelganimda, o‘rinbosar jamoa yakkalanib qolgandi.

Akademiya asosiy jamoaning bir qismi emas edi. Men uni darhol o‘zgartirdim. Xuddi "Ayaks"dagi kabi.

"MYU"da o‘rinbosarlar jamoasi mening qo‘l ostimga o‘tdi. Bu asosiy jamoaga iqtidorli yosh o‘yinchilarning kirib kelishiga ta’sir qilishimning yagona yo‘li edi.

Albatta, men yoshlar jamoalarining murabbiylariga erkinlik beraman, lekin, masalan: “Men bu futbolchining shu pozisiyada ko‘proq daqiqalar olishini istayman” deb ularga yo‘nalish berishim mumkin.

Zaxiradagilarning yaxshi o‘yin ko‘rsatishi va asosiy tarkibga o‘tadigan o‘yinchilar oqimi uchun asosiy mas’uliyat menda", - deydi Ten Xag.