Fransiya bosh murabbiyi Didye Deshamning 2026 yilning iyuniga qadar amal qiladigan yangi shartnomasi qayta ko‘rib chiqilishi mumkin, deb xabar beradi L'Equipe.
Gap shundaki, Fransiya futbol federasiyasi ijroiya kengashining ayrim a’zolari Desham bilan shartnomani uzaytirish haqidagi qarorni faqat tuzilma prezidenti Noel Le Gre qabul qilgan deb hisoblamoqda.
Qayd etilishicha, juma kuni bo‘lib o‘tgan yig‘ilishda rahbar terma jamoa murabbiyi bilan shartnomani uzaytirish masalasini ko‘tarmagan yoki muhokama qilmagan, shanba kuni esa bu haqda rasman e’lon qilingan.
Federasiyaning ba’zi a’zolari Le Gre tez orada o‘z lavozimini tark etishiga umid qilmoqda. Bunda Desham bilan shartnoma bekor qilinmaydi, shunchaki qayta ko‘rib chiqiladi. 2024 yilning yozida murabbiyni tark etish imkoniyati to‘g‘risidagi bandni joriy etish rejalashtirilmoqda.
Ijroiya kengashi Desham bilan hamkorlik qilishga qarshi emas, lekin Le Grening xatti-harakatidan g‘azablangan.
Avvalroq Fransiya futbol federasiyasining sobiq xodimlari Le Grega qarshi ko‘rsatma bergani xabar qilingandi.
