Франция бош мураббийи Дидье Дешамнинг 2026 йилнинг июнига қадар амал қиладиган янги шартномаси қайта кўриб чиқилиши мумкин, деб хабар беради L'Equipe.
Гап шундаки, Франция футбол федерацияси ижроия кенгашининг айрим аъзолари Дешам билан шартномани узайтириш ҳақидаги қарорни фақат тузилма президенти Ноэль Ле Гре қабул қилган деб ҳисобламоқда.
Қайд этилишича, жума куни бўлиб ўтган йиғилишда раҳбар терма жамоа мураббийи билан шартномани узайтириш масаласини кўтармаган ёки муҳокама қилмаган, шанба куни эса бу ҳақда расман эълон қилинган.
Федерациянинг баъзи аъзолари Ле Гре тез орада ўз лавозимини тарк этишига умид қилмоқда. Бунда Дешам билан шартнома бекор қилинмайди, шунчаки қайта кўриб чиқилади. 2024 йилнинг ёзида мураббийни тарк этиш имконияти тўғрисидаги бандни жорий этиш режалаштирилмоқда.
Ижроия кенгаши Дешам билан ҳамкорлик қилишга қарши эмас, лекин Ле Гренинг хатти-ҳаракатидан ғазабланган.
Аввалроқ Франция футбол федерациясининг собиқ ходимлари Ле Грега қарши кўрсатма бергани хабар қилинганди.
