Parij va arab klublari o‘rtasidagi shou-uchrashuvni ko‘rib o‘tirib, yozyapman. Aslida oddiy bir o‘rtoqlik o‘yini butun dunyoda ajiotaj uyg‘otgani, juda ko‘pchilik qiziqish bildirayotganiga guvoh bo‘ldim – sababi ma’lum, narigi tarafda Krishtianu Ronaldu bor va yangi jamoadoshlari bilan ilk marotaba maydonga tushmoqda.

Men bilgan Ronaldu bu o‘yinda maydonga tushmasligi kerak edi. Futbol nuqtai nazaridan fikrim shu, bu o‘yin unga nisbatan nohaqlik – narigi tarafda Yevropa futbol yulduzlari, dunyoning eng zo‘r sheriklar bilan birga Messi. Ronaldu esa, birinchidan, saviya jihatidan ancha pastroq, ikkinchidan, hali biror marta birga o‘ynamagan, uchinchidan, ikki jamoa tarkibidan yig‘ilgan sun’iy tarkibda maydonga tushmoqda. Hisob juda yirik bo‘lib ketsa nima bo‘ladi axir?

Nafaqat kuchlar teng emas, kuchlar o‘ta nohaq ham, ya’ni Ronalduning ustunliklarini yuzaga chiqarmaydigan, aksincha, Messini yanada yuqori ko‘rsatadigan shartlar. Lekin o‘yin “Ronaldu – Messi”ning so‘nggi qarama-qarshiligi sifatida marketing yurish orqali taqdim etilmoqda. Shunday emasmi?

Krishtianu Ronaldu bu shartlarga rozi bo‘lgan ekan, demak moliyaviy tomondan juda qoniqarli takliflar ilgari surilgan bo‘lishi kerak. Bundan tashqari, menimcha, o‘sha o‘rtoqlik va shou maqomida bo‘lgani uchun parijliklar ozgina yon bosish orqali, hisobni chiroyliroq ko‘rinishiga rozi bo‘ladilar yoki arablar masalan, motivasiya tomondan ustunlik orqali, qandaydir teng kurash taqdim etadilar. Ishqilib, shunaqa bo‘lsin.

Qahramon Aslanov.