"Manchester Siti" kelasi yozda o‘z yarim himoyasini kuchaytirmoqchi.
Daily Mail xabariga ko‘ra, klub "Lester" yarim himoyachisi Jeyms Meddisonga qiziqish bildirmoqda. Bundan tashqari, “Man Siti” Dortmundning “Borussiya” klubi futbolchisi Jud Bellingemga qiziqishda davom etmoqda.
"Manchester Siti"ning Meddisonga e’tibor qaratayotgani Pep Gvardiola jamoada ko‘proq uzoqdan zarba beruvchi yarim himoyachilarni istashi bilan bog‘liq. Jeymsning "Lester" bilan amaldagi shartnomasi 2024 yilning yoziga qadar mo‘ljallangan, hali yangi shartnoma imzolanmagan.
O‘tgan yozda "Nyukasl" angliyalik futbolchi uchun ikkita taklif bilan chiqqan, biroq futbolchini 60 million funtga baholagan "Lester" uni rad etgandi. Bundan tashqari, joriy qishda Premyer-liganing bir qancha top-klublari Meddisonga so‘rov bilan chiqishdi.
Jeyms o‘zini top-klubda sinab ko‘rmoqchi, “Lester” esa shartnomasi 2023 yilning yoziga qadar davom etadigan Yuri Tilemans bilan vaziyatni takrorlamaslikka bel bog‘lagan. U allaqachon xorij klublari bilan muzokaralar olib borish huquqiga ega.
Qayd etilishicha, Ilkay Gyundogan va Bernardu Silvaning “Manchester Siti”dagi kelajagi so‘roq ostida.
Gyundoganning shartnomasi yozgacha amal qiladi, uning tekinga "Barselona"ga o‘tishi xabar qilingandi. Silva ko‘pdan beri Ispaniyadan qaysidir klubga o‘tishni orzu qilgan. "Barselona" uni o‘tgan yozda sotib olishga urinib ko‘rdi, ammo 70 million funt sterling talab qilgan "Man Siti"ning moliyaviy talablarini qondira olmadi. Bernardu boshqa klubga o‘tishga majbur bo‘ladimi yoki yo‘qmi hozircha noma’lum.
