Qishki transfer oynasidan foydalangan «Metallurg» PFK tarkibini Superliganing tajribali o‘yinchilaridan biri bilan boyitdi. O‘tgan mavsumni «So‘g‘diyona» jamoasida o‘tkazgan hujumchi Husniddin G‘ofurov «Metallurg» jamoasi bilan shartnoma imzoladi.

Husniddin futbolchilik faoliyatini «NBU Osiyo» jamoasida boshlab, qisqa muddat ichida  xorij jamoasiga o‘tib ketgan kam sonli o‘zbek futbolchilaridan biri sanaladi. 2013 yilda Serbiyaning «Yavor» jamoasi bilan shartnoma imzolagan G‘ofurov keyinchalik «Mladost» klubida ham o‘ynadi. 2018 yildan e’tiboran esa Superligamizga qaytdi. Ilk mavsumdayoq «Lokomotiv» tarkibida O‘zbekiston chempionatida shohsupaning yuqori pog‘onasiga ko‘tarildi. Keyingi mavsumda esa «Paxtakor» bilan oltin medalga sazovor bo‘ldi. U shuningdek, Termizning «Surxon», Olmaliqning AGMK, Farg‘onaning «Neftchi» hamda Jizzaxning «So‘g‘diyona» jamoalarida o‘ynadi.

Husniddin G‘ofurov ikki karra O‘zbekiston chempioni (2018, 2019), O‘zbekiston kubogi sohibi (2019). Superligada 105 ta o‘yinda maydonga chiqqan, 8 ta gol kiritgan, 13 marta sariq kartochka bilan jazolangan.
 
Husniddin G‘ofurov, 28 yoshda.
1994 yilning 29 iyul sanasida Farg‘ona viloyatida tug‘ilgan.
Bo‘yi – 176 sm
Vazni – 74 kg
Ampluasi - hujumchi